တန်ဆောင်မုန်းလပြည့်ည

၁၃၇၁ ခုနှစ် တန်ဆောင်မုန်းလပြည့်ည
( 2-11-2009 )ကျန်စစ်သားရိပ်သာ အဆောင် (က) အခန်း (၈၁)

အခန်းရှေ့ ကော်ရစ်ဒါက ကွန်ကရစ် ပွတ်လုံးတိုင်များကြားမှာ ဖယောင်းတိုင် ထွန်းနေရင်း ဘေးပတ်ဝန်းကျင်နှင့် အဆောင် (ခ) တို့ကို စူးစမ်းကြည့်မိတော့ မီးထွန်းသူမှာ မိမိ တစ်ယောက်တည်း။ တန်ဆောင်မုန်း လပြည့်ညဆိုတာ မသိကြတော့ဘူးလား။ မဉ္ဖူသင်း၏ ယုံတမ်းစကား သီချင်းခွေကို နားထောင်နေရင်း တစ်ယောက်တည်း မီးထွန်းနေမိသည်။ လကလည်း သာ။ တစ်ချက်တစ်ချက် ဝေ့လိုက်သော လေကြောင့် ငြိမ်းသွားသော ဖယောင်းတိုင်များကို မီးလိုက်ညှိရင်း အရင်တုန်းက ကျော်ဖြတ်ခဲ့ဖူးသော တန်ဆောင်မုန်း လပြည့်ညများအကြောင်း သတိတရ တွေးနေမိပါသည်။
ငယ်စဉ်တုန်းကတော့ သတင်းကျွတ်တော့မည် ဆိုသည်နှင့် မီးထွန်းပွဲအတွက် အစောကြီးကတည်းက ကြိုတင် ပြင်ဆင်ရတော့သည်။ မီးပုံးလေးတွေ ကိုယ်တိုင်လုပ် အခန်းထဲမှာ ချိတ်ထား၊ လာသမျှလူကို ကြွား။ အဆွေအမျိုး မိသားစုထဲမှာ ဒီလိုမျိုး ထွင်ထွင်ကျည်ကျည် ဘယ်သူမှလည်း လုပ်တဲ့သူ မရှိသဖြင့် တွေ့ဖူး မြင်ဖူးသမျှ အတုယူကာ တတ်သရွေ့ မှတ်သရွေ့ လုပ်ရသည်။ သတင်းကျွတ် လပြည့်မှာတစ်ခါ တန်ဆောင်မုန်း လပြည့်မှာတစ်ခါ မီးထွန်းရသဖြင့် မီးပုံးလေးတွေ လုပ်ရကျိုးနပ်ပါသည်။
တန်ဆောင်မုန်း လပြည့်ညကတော့ ရွာက မိဖုရားကုန်းဘုရားကြီးမှာ ဆီမီး ကပ်လှူပွဲ လုပ်သဖြင့် မတိုင်ခင် သုံးလေးရက် အကြိုကတည်းက မီးခွက်ဆေး မီးခွက်သယ် ဘုရားကို သန့်ရှင်းရေးလုပ် မီးခွက်တွေ ဘုရားပေါ်မှာ နေရာချ၊ လပြည့်နေ့ဆိုလျှင် မနက်ကတည်းက မီဇာထည့် ဆီထည့်၊ ညနေပိုင်းမှာ တဖွဲဖွဲ ရောက်လာသော အလှူရှင် ပါရမီရှင်များကလည်း သူတို့လှူသော ဆီကို ကိုယ်တိုင်လိုက်ထည့်ချင်သဖြင့် ခွင့်ပြုရသေး။ အမေငွေခင်ကလည်း အာပေါင်အာရင်း သန်သန်ဖြင့် ဟောပြော၊ မ်ိန်းမတွေ ဦးစီးသော မိဖုရားကုန်း ဘုရားကြီး၏ တန်ဆောင်မုန်းလပြည့် ဆီမီး ပူဇော်ပွဲမှာ ကျွန်တော်ကတော့ နှစ်စဉ် ပါဝင်နေကျ ဇာတ်လိုက်ကျော်လေး ဖြစ်ခဲ့သည်။
မနက်ခင်းပိုင်း အာရုဏ်မတက်ခင်ကတည်းက နှစ်စဉ်ပြုမြဲဝတ် ဖြစ်သည့် ဆွမ်းတော်ကြီး ကပ်လှူပွဲမှာ ကျွန်တော်က ကြေးစည်ထမ်းရသည်။ မနက်စောစော ရောင်နီမလာခင် အင်းသာမြောက်ကျောင်း ရေကန်ကြီး နံဘေးရှိ ကမ္မဌာန်းကျောင်းလေးမှာ အမေငွေခင်တို့ အမေရွှေမှင်တို့ အမေရင်တို့ အမေရီတို့ ဆရာလေးတွေ၊ နောက် ကျွန်တော့် ကစားဖော်များလည်းဖြစ် ပါရမီဖြည့်ဖက်များလည်း ဖြစ်ကြသော မဥမ္မာတို့ မီးမီးတို့ အောင်မျိုးဝင်းတို့ တွေနှင့် မိဖုရားကုန်း ဘုရားကြီးကို ကြေးစည်သံ တဝေဝေဖြင့် ချီတက်ကြပြီး သစ်သီးမျိုးစုံ ထန်းလျက် ပေါက်ပေါက်ဆုပ် သစ်သီးယိုစုံတို့ဖြင့် တန်ဆာဆင်အပ်သော ဆွမ်းတော်ကြီးကို ကပ်လှူကာ မနက်ဝေလီဝေလင်းမှာ ပြန်လာကြတာ မှတ်မိပါသေးသည်။
တစ်ဆက်တည်း မှတ်မိတာက ကျွန်တော့်အဖိုး ဆုံးမည့် တန်ဆောင်မုန်းလပြည့်ကျော် တစ်ရက်နေ့ မနက် ဝေလီဝေလင်းမှာ ကမ္မဌာန်းကျောင်း ပြတင်းပေါက်က ပြုတ်ကျတာဖြစ်သည်။ ပြတင်းပေါက်က အကာအရံမရှိသော ကြမ်းတပြေးတည်းပေါက် ဖြစ်ပြီး ပြတင်းပေါက် အနီးမှာ ထိုင်ရင်း မနက် ဝေလီဝေလင်းမှာ အိပ်ငိုက်ပြီး ပြုတ်ကျတာ ဖြစ်နိုင်သည်။ မြေကြီးပေါ်ကို ကျောပြင်ဖြင့် အင့်ကနဲ ပြုတ်ကျအပြီး ခဏလောက် အသက်ရှူ အောင့်သွားကာ အမောတကော ပြေးလာပြီး ထူသူများ မေးတာကို ရုတ်တရက် မဖြေနိုင်ပဲ တော်တော်ကြာမှ အသက်ပြန်ရှူနိုင်တာကို အမြင့်က ပြုတ်ကျသည့် အရသာတစ်မျိုးအဖြစ် စိတ်ထဲမှာ ခံစားကြည့်မိနေပါသည်။ အဖိုးဆုံးမည့် မနက်မှာ ဖြစ်သည့် အဖြစ်အပျက်မို့ တစ်ချို့က အဖိုး သွားခါနီး သူ့မြေးချစ်ကို နှုတ်ဆက်တာလို့ ဆိုသူက ဆိုပါသည်။ ညနေ ကျောင်းက ပြန်လာတိုင်း လွယ်အိတ်လေး ဘေးမှာချပြီး အဖိုးကို နင်းနှိပ်ပေးတတ်သည့် ချစ်လှစွာသော သြရဿမြေးချစ်ကို အဖိုးက ဒီနည်းနဲ့တော့ နှုတ်ဆက်ချင်မည် မထင်ပါ။
လပြည့်ည မီးပူဇော်မည်ဆိုလျှင် ကျွန်တော်တို့ ဒေသက မြတ်စွာဘုရား ဆံတော်အစစ်များ ကိန်းအောင်းသည်ဟု ယုံကြည်ကြသော စမတောင်တော် ကမ္ဘာ့ကပ်ကျော်စေတီ၊ မိဖုရားကုန်းဘုရားတို့ ပါဝင်သည့် ဘုရားခြောက်ဆူတွင် နေဝင်သည်ကို ကြည့်ပြီး တပြိုင်တည်း မီးစထွန်းရတာ အစဉ်အလာတစ်ခု ဖြစ်ပါသည်။ မိဖုရားကုန်း ဘုရားဆိုလျှင် ပိုမိုတန်ခိုးကြီးသည့် စမတောင်တော်ပေါ်က မီးရောင်မြင်မှ မီးစထွန်းရပါသည်။ ဘုရား အပေါ်ဆင့်တွေမှာ အဆင်သင့် စောင့်နေသော ယောက်ျားကြီးများက စမတောင်တော်ကို မျှော်ကြည့်ရင်း တောင်တော်ပေါ်က မီးရောင်မြင်ရပြီဆိုလျှင် အားလုံးမီးထွန်းနိုင်ကြောင်း အချက်ပေးပါသည်။ ဘုရားတစ်ခွင် အသင့်စောင့်နေသော ပါရမီရှင်များက မီးကို တပြိုင်တည်း ထွန်းညှိ ပူဇော်ကြပါသည်။
ဘုရားမှာ မီးထွန်းပြီးပြီ ဆိုလျှင်တော့ အနီးနားတဝိုက်က ဘုရားတွေကို လှည့်လည်ကြပါတော့သည်။ ရွာမှာတော့ ရွာအရှေ့ထိပ်မှာ ရန်ပြေမာန်ပြေဘုရား၊ ရွာတောင်ပိုင်းမှာ ကိုးနဝင်းစေတီ၊ အရင်က ရန်ကုန်-မန္တလေး ကားလမ်းဘေးက ထမင်းဆိုင် နာမည်ကြီး ရသေ့တောင် ဘုရားများ စသည်ဖြင့် လှည့်လည်ကြပါသည်။ ဘယ်ဘုရားက မီးကတော့ဖြင့် ပိုလှသည်၊ တို့ဘုရားကတော့ အလှဆုံးပဲ စသည်ဖြင့် ကြံဖန် ဂုဏ်ယူကြပါသည်။ ပြီးတော့ အိမ်တွေကလည်း မီးထွန်းကြသဖြင့် လှည့်လည်သွားလာရင်း ကြည့်ရတာ ပျော်စရာကောင်းပါသည်။ တန်ဆောင်မုန်း လပြည့်ညမှာ ပွဲလမ်းသဘင် အဆိုအတီးတော့ ရှိလေ့ မရှိပါ။
စစ်တက္ကသိုလ်မှာတော့ တန်ဆောင်မုန်း လပြည့်ညဆိုလျှင် ပျော်စရာပွဲလေးတွေ ရှိတတ်သည်။ နောက်ဆုံးနှစ် (၂၀၀၁) တန်ဆောင်မုန်းလပြည့်ည မီးပုံးပျံလွှတ်ပွဲကိုတော့ မဆင်နွှဲလိုက်ရပါ။ ငှက်ဖျားလိုလို ဘာလိုလိုနှင့် ဆေးရုံပေါ်ရောက်နေလို့ဖြစ်သည်။ ကျွန်တော်တို့ခေတ် တစ်ခါသာ ကြုံခဲ့ရသော မီးပုံးပျံပွဲကို လွတ်သွားတာ နာလှပါသည်။
ကျောင်းဆင်းပြီးစ ဒုဗိုလ်ဘဝ (၂၀၀၂) တန်ဆောင်မုန်း လပြည့်ညမှာတော့ ပုသိမ်က တိုက်ပွဲဝင်စည်းရုံးရေးသင်တန်းကို ရောက်နေပါသည်။ ထူးထူးခြားခြား မမှတ်မိတော့ပါ။
ရန်ကုန်တက္ကသိုလ်တက်တော့ ပထမနှစ်နှင့် ဒုတိယနှစ် တန်ဆောင်မုန်း လပြည့်ညများကို ထွေထွေထူးထူး မမှတ်မိပဲ နောက်ဆုံးနှစ် တန်ဆောင်မုန်း လပြည့်ညမှာတော့ ( အရင်နှစ်က အင်ဂျန်နီယာ အစ်ကိုကြီးတွေမီးထွန်းတာကို အားကျပြီး) အဆောင်ပေါ်မှာ မီးထွန်းကြတာ မှတ်မိပါသည်း။ လပြည့်နေ့ မတိုင်ခင်ကတည်းက ပိုက်ဆံကြိုကောက် ကုန်ကျမည့် ဖယောင်းတိုင် တွက်ချက်ပြီး အပေါ်ဆံုံးထပ် ကော်ရစ်ဒါ တလျှောက်လုံးနှင့် ဆင်ဝင်အပေါ်မှာ မီးထွန်းတာဖြစ်သည်။ သင်္ချာက ကျော်လင်း ပေါတာ ကျော်ဇေယျ တို့ကလည်း များစွာ ကူညီကြပါသည်။
ရန်ကုန်တက္ကသိုလ်က ဆင်းပြီး ဗထူးမှာ ခြေလျင်တပ်ခွဲမှူးသင်တန်း တက်တော့လည်း တစ်ဆောင်လုံး မီးထွန်းနိုင်အောင် စီနီယာ အစ်ကိုကြီးတွေကို စည်းရုံးကာ ပိုက်ဆံစု ကုန်ကျမည့် ဖယောင်းတိုင်တွက်ချက်က ည ကိုးနာရီ တန်းဖြုတ်မှာ တစ်ဆောင်လုံး မီးထွန်းပါသည်။ ဒီတစ်ခါတော့ ရန်ကုန်မှာထက် သာပါသည်။ နှစ်ထပ်ဆောင်ကို အပေါ်အောက် မီးထွန်းနိုင်ခဲ့ပါသည်။ မီးထွန်းဖို့ကို တော့ နေ့လည် မွန်းတိမ်းကတည်းက စပြီး ပြင်ဆင်ရပါသည်။ တစ်ပတ်လောက် ကြိုကောက်ထားသော ပိုက်ဆံဖြင့် ဖယောင်းတိုင်တွေဝယ်၊ အဆောင်က ကော်ရစ်ဒါ ပွတ်လုံးတိုင်တွေကြားမှာ လိုက်စိုက်၊ ညကျတော့ တစ်ဆောင်လုံး တစ်ပြိုင်တည်း မီးထွန်းကြနှင့် ပျော်ဖို့ကောင်းပါသည်။ ညခုနစ်နာရီ တန်းဖြုတ်ပြီးချိန် ဘုရားကို သွားပြီး မီးပူဇော်ကာ ညကိုးနာရီ အဆောင်မှာ မီးထွန်းပြီးတော့ မီးပုံးပျံလည်း လွှတ်ပါသည်။ တပ်ခွဲမှူးသင်တန်း အဆောင် လေးဆောင် ရှိသည့်အနက် ကျွန်တော်တို့တစ်ဆောင်သာလျှင် ညီညာဖျဖျ မီးထွန်းကြတာဖြစ်ပြီး ကျန်ဘယ်အဆောင်မှ ကျွန်တော်တို့အဆောင်လို မီးထွန်းတာမျိုး မရှိပဲ ကိုယ့်အစီအစဉ်နှင့်ကိုယ် ဖြိုးတိုးဖျောက်တောက် ထွန်းကြတာပဲ ရှိပါသည်။ ကုန်ကျမည့်ပိုက်ဆံကို အလှူလိုက်ခံစဉ် လိုသလောက် ပိုက်ဆံကို လှူပေးကြသော အစ်ကိုကြီးများကို ကျေးဇူးတင်မိပါသည်။ တကယ်ဆိုလျှင်တော့ ဒီလို အစ်ကိုကြီးတွေသာ မရှိဘူးဆိုလျှင် ကျွန်တော်တို့အဆောင် မီးထွန်းပွဲ ဒီလောက်စည်ကားမည် မထင်ပါ။